لە پێناو بەرجەستەكردنی مامەڵەیەكی باشترو بەرپرسیارانە لەگەڵ سزادراوان و دەستنیشانكردن و چارەسەركردنی ئەو كەموكورتییانەی هەیە، تیمی چاودێری نوسینگەی مافی مرۆڤ لە سلێمانی سەردانی باڵەخانەی چاكسازی گەورانی سلێمانی كرد. سەرەتا تیمەكە پیرۆزباییان لە بەڕێوەبەری نوێی چاكسازیەكە كرد بە بۆنەی دەستبەكاربوونیەوە و هیوای سەركەوتنیان بۆ خواست و پێشنیاریش كرا، كە پێكەوە هاوكارو هەماهەنگ بن بۆ چارەسەركردنی كێشەكان و پاراستنی پرەنسیپەكانی مافی مرۆڤ لەناو چاكسازی سلێمانی، لە كاتێكدا هەندێك كێشە و ئاریشە بەهۆی كەمی هۆشیاری و مامەڵەی تانەندروستەوە ڕوودەدات. یەكێكی تر لەو بابەتانەی لەگەڵ ئیدارەی نوێی چاكسازی گەورانی سلێمانی باسكرا بابەتی كۆنترۆڵكردنی ماددەی هۆشبەر بوو، كە دەوترێت هەندێك جار هەوڵدەدرێت بگەیەنرێتە دەست سزادراوان تا بەكاری بێنن. لەو بەسەركرنەوەیەدا پێشنیار كرا فەرمانبەرێكی هۆبەی چاودێری بەندیخانەكان لە نوسینگەی سلێمانی هەفتەی رۆژێك تەنسیب بكرێت و لە چاكسازی دەوام بكات بە مەبەستی ئەنجامدانی كاروبارەكان و ئاگاداربوون لە داواكاری و سكاڵا و رەوشی زیندانیان و سزادراوان بە گشتی.

Share This