مه‌سیحیه‌كان (كه‌لدان وسریان وئاشوری) .. مێژووه‌ك له‌خه‌بات و قوربانی دان له‌ پێناو ئازادی ومافى خۆ چاره‌نوس

ئه‌گه‌ر ئاورێك له‌میژووی ده‌وله‌تی عێراق بده‌ینه‌وه‌ ده‌بینین كه‌ هه‌ر له‌دروست بونیه‌وه‌ ده‌وڵه‌تێكی لێكدراو بوو له‌چه‌ندان نه‌ته‌وه‌و ئایین و پێكهاته‌ زلهێزه‌كان بۆ به‌رژه‌وه‌ندی خۆیان بێ گه‌ڕانه‌وه‌ بۆڕاو ویستی ئه‌و گه‌لانه‌ دروستیان كرد و ئاره‌زومه‌ندانه‌ نه‌بوو.

هه‌ر ئه‌وه‌ش وایكرد كه‌ به‌هۆی زۆرینه‌و كه‌مینه‌وه‌ له‌ ڕووی ئایننی و نه‌ته‌وه‌یه‌وه‌ ئه‌وانه‌ باڵاده‌ست بن كه‌ زۆرینه‌ن و له‌و ڕۆژه‌وه‌ نه‌هامه‌تیه‌كان ده‌ستی پێكردو مافی خه‌ڵكی تر فه‌رامۆش كرا چونكه‌ هیچ كات به‌دریژایی مێژووی مرۆڤایه‌تی هه‌ركات مرۆڤه‌كان هه‌ستیان كردبێت ده‌چه‌وسێنرێنه‌وه‌ و مافه‌كانیان پشتگوێ ده‌خرێ ئیتر رێگای خه‌بات و تێكۆشانیان گرتۆته‌ به‌ر بۆ سه‌ندنه‌وه‌ی مافه‌كانی خۆیان.

بۆیه‌ش هه‌ر له‌سه‌ره‌تای دروست بونی ئه‌و ده‌وڵه‌ته‌ خه‌باتی چه‌كداری دژی ده‌سه‌ڵاتی ئه‌وكاتی داگیركاری به‌ریتانی و حو‌كمڕانی ده‌ستی پێكرد له‌سه‌ر ده‌ستی شێخ محمودی حه‌فید بوه‌، سه‌ره‌تایه‌ك بۆ خه‌باتی ئه‌و گه‌ل و خه‌ڵكانه‌ی كه‌ هه‌ستیان كرد ئیتر هه‌ولێك هه‌یه‌ بۆ ئه‌وه‌ی ئه‌و خه‌ڵكه‌ بخرینه‌ زیندانیه‌كی گه‌وره‌ به‌ناوی ده‌وڵه‌تی عێراق بۆیه‌ شۆرش ده‌ستی پێكرد كه‌ ئه‌و شۆرشه‌ توانی هه‌مو گه‌لان و نه‌ته‌وه‌و ئایینزاكانی كوردستان له‌خۆ بگرێت ئیتر له‌و ساته‌وه‌ خه‌باتی مه‌سیحیه‌كان هاوكات له‌گه‌ڵ برا كورده‌كانیان و ته‌نانه‌ت نه‌ته‌وه‌و ئایینه‌كانی تر ده‌ستی پێكرد بۆخه‌باتی وه‌گرتنه‌وه‌ی مافه‌كانیان و پارێزگاری كردن له‌ناسنامه‌و مانه‌وه‌یان.

مه‌سیحیه‌كان به‌درێژایی ئه‌و مێژووه‌ به‌رده‌وام بون له‌خه‌بات و بۆیه‌ش ده‌سه‌ڵاتدارانی ده‌وڵه‌تی عێراق هیچ كات سڵیان نه‌كرده‌وه‌ له‌هه‌وڵه‌كانیان بۆ له‌ناو بردنیان و به‌رده‌وامیش ڕووبه‌روی توندوتیژی و ئازاردان وداگیركاری ده‌بونه‌وه‌و له‌خانوو ماڵ و شوێنی خۆیان به‌زۆر ده‌رده‌كران له‌پارێزگاكانی خواروی عێراق باجی ئه‌وه‌شیان ده‌دا كه‌ ئه‌وان له‌ڕووی ئاییینه‌وه‌ مه‌سیحین وله‌روى نه‌ته‌وی (كه‌لدان وسریان وئاشوری) و له‌هه‌مان كات باجی ئه‌وه‌ش كه‌ مه‌سیحیه‌كان پشتگیری خه‌باتی كوردستان ده‌كه‌ن.

بۆیه‌ له‌گه‌ل ده‌ست پێكردنی شۆرشی ئه‌یلول له‌ ساڵی 1961 مه‌سیحیه‌كان به‌شێكی دیارو كاریگه‌ر بون له‌و شۆرشه‌و هاوشان له‌گه‌ڵ برا كورده‌كانیان و ئێزیدیه‌كان و ته‌نانه‌ت توركمانه‌كانیش به‌شداربون له‌گه‌ل خه‌باتی چه‌كدار، چونكه‌ ئه‌وانیش هه‌ستیان كرد كه‌ مافه‌كانیان پێشێل ده‌كرێ و ماڵ و موڵكیان داگیر ده‌كرێ و بێ به‌ش ده‌بن له‌ماف و ئیمتیازه‌كان، بۆیه‌ هه‌مو لایه‌ك پێكه‌وه‌ چونه‌ ڕیزی شۆرشه‌وه‌، وه‌ سه‌ركرده‌و خه‌ڵكی دیاری مه‌سیحیه‌كان رۆڵیان هه‌بو له‌شۆرش و سه‌ركردایه‌تی ئه‌وكاتی شۆرشیش به‌چاوی ڕێزو برا هاوبه‌شه‌وه‌ مامه‌ڵه‌یان له‌گه‌ڵ مه‌سیحیه‌كان ده‌كرد.

هه‌ربۆیه‌ش دوای ئه‌وه‌ی به‌عسیه‌كان هاتنه‌ سه‌ر ته‌ختی حوكم له‌وێوه‌ بوه‌ سه‌ره‌تایه‌كی تاڵ و ناخۆش بۆ سه‌رجه‌م ئه‌و نه‌ته‌وه‌ و ئایین وخه‌ڵكانه‌ی كه‌ جیاواز له‌وان بیر ده‌كه‌نه‌وه‌. ئیتر ده‌سه‌ڵات كه‌وته‌ ده‌ستییه‌ك تائیفه ‌و حیزب كه‌ حیزبی به‌عس بون، له‌وێوه‌ ته‌واوی ئازادیه‌كان و مافه‌كان له‌ گۆڕنران و له‌ناوبردنی مرۆڤه‌كان و ئازادیخوازان ده‌ستی پێكردوو به‌ندیخانه‌كان پڕ كران له‌نه‌یارانی ده‌سه‌ڵات و ده‌یان چالاكوان و خه‌باتگێری مه‌سیحی كه‌وتنه‌ به‌ندیخانه‌كانی رژێم و ئاماده‌ نه‌بون ئه‌و زوڵم و ده‌سه‌ڵاته‌ قبوڵ بكه‌ن، ئیتر له‌و ساته‌وه‌ش قۆناغێكی سه‌ختی تر ده‌ستی پێكرد بۆ مه‌سیحیه‌كان رووبه‌روی ده‌ركردن و داگیركاری موڵك و زۆر كێشه‌ی تر بونه‌وه.‌

له‌دوای ده‌ست پێكردنه‌وه‌ی شۆرشی تازه‌ی گه‌لانی كوردستان له‌ساڵی 1976 دیسان مه‌سیحیه‌كان به‌ كه‌لدان وسریان وئاشوریه‌كان دانه‌بڕان  به‌شێك بون له‌و شۆرشه ‌و ده‌ست له‌ناو ده‌ست بون له‌گه‌ڵ برا كورده‌كانیان، چونكه‌ هه‌میشه‌ مه‌سیحیه‌كان به‌و چاوه‌ خه‌باتیان كردوه‌ كه‌ بۆخاتری كه‌س نیه‌ به‌ڵكو ئه‌و خه‌باته‌ له‌پێناو داكۆكی كردن بوه‌ له‌مافی خۆیان له‌سه‌ر ئه‌و خاكه‌ی كه‌ ده‌یان سه‌ده‌یه‌ شارستانیه‌ت و مێژووی خۆیان له‌سه‌ر ئه‌و خاكه‌یه‌و ئێره‌ ماڵ و موڵكی خۆیانه‌ و ئه‌وان داگیر كه‌ر نین بۆ سه‌ر خاكی كه‌س به‌ڵكو ماڵ و موڵك و خاكی خۆیان داگیركراوه ‌و ده‌رده‌كرێن و ئاواره‌ ده‌بن و كۆچ ده‌كه‌ن.

دوای راپه‌رینه‌ مه‌زنه‌كه‌ی ساڵی 1991 و رزگار كردنی به‌شێكی زۆری خاكی كودستان دیسان مه‌سیحیه‌كان برا به‌ش بون له‌و خه‌باته‌ و ته‌نانه‌ت چه‌ندان شه‌هیدو قوربانیان دا له‌و پێناوه‌ و چه‌ندانیان له‌زیندانه‌كان له‌ژێر ئه‌شكه‌نجه‌ شه‌هید بون وبه‌شێكی تریان له‌ڕیزی ڕیكخستنه‌ نهێنیه‌كانی شۆرش بون ئه‌و رۆژه‌ له‌گه‌ل هێزی پێشمه‌رگه‌ هاتنه‌ خواڕێ.

مه‌سیحیه‌كان له‌حوكمڕانی خۆبه‌خۆی كوردی به‌شداربون ئه‌گه‌ر به‌ڕێژیه‌كی كه‌میش بوبێت و وه‌ك پێویست نه‌بێت له‌ئاستی ژماره‌ و خه‌باتی مه‌سیحیه‌كان ، به‌ڵام مه‌سیحیكان لایان وابوه‌ كه‌ ده‌توانرێت له‌گه‌ڵ سه‌ركردایه‌تی كورد وحزبه‌ كوردستانیه‌كان زۆرتر و باشتر له‌یه‌كتر تێبگه‌ن بۆ وه‌رگرتنه‌وه‌ی زیاتر مافه‌كانیان و ئه‌وه‌ی پێویسته‌ بۆیان بكرێت چونكه‌ مه‌سیحیه‌كان خۆیان به‌بێگانه‌ نه‌زانیوه‌ له‌و خاكه‌ وبه‌ڵكو خۆیان به‌خاوه‌نی ڕاسته‌قینه‌ زانیوه‌ به‌شێوازی مه‌ده‌نی ده‌ستیان كرد به‌خه‌بات له‌و پێناوه‌ و توانیان چه‌ند حیزبی سیاسی دابمه‌زرێنن به‌ پێى تابه‌تمه‌ندی خۆیان له‌ روی مافی نه‌ته‌وه‌ى و نوێنه‌ریان بچێته‌ په‌رله‌مان ( 5 ئه‌ندامیان هه‌یه‌ وه‌كو كۆتا ) وبه‌شدار بن له‌ حوكمه‌ت و سستمی حوكمرانی وبه‌شه‌ك بن له‌ پرۆسه‌ى سیاسی ومه‌ده‌نی وباوه‌ریان به‌ پێكه‌وه‌ژیان و یه‌كتر قبول كردن هه‌یه‌ هه‌ر وه‌كو كه‌ ئیستا له‌ هه‌ریمی كوردستان كه‌ ئه‌مه‌ بونی هه‌یه‌ نێوان هه‌موو پێكهاته‌كانی ئاینی و نه‌ته‌وی له‌ كوردستان.

به‌ڵام به‌داخه‌وه‌ دوای روخانی رژێمی به‌عس به‌ته‌واوی له‌ساڵی 2003 وه‌ له‌سه‌ر ده‌ستی ئه‌مریكاو هاوپه‌یمانه‌كانی، ئیتر خه‌ڵك و گه‌لانی عێراق به‌گشتی و مه‌سیحیه‌كانی ناوراست  وباشوریش به‌تایبه‌تی چاویان له‌وه‌ بوو كه‌ ئیتر ده‌توانن له‌مه‌ودوا له‌خاكی خۆیان و عێراقی تازه به‌ئازادی بژین و مافه‌كانیان بۆ بگه‌ڕێته‌وه‌ و به‌شدار بن له‌پرۆسه‌ی سیاسی و حوكمڕانی، به‌ڵام هاوكێشه‌كان پێچه‌وانه‌ بونه‌وه‌، هه‌ر له‌ كۆتای ساڵی 2004 كۆچی به‌زۆره‌ ملێى  مه‌سیحیه‌كان ده‌ستی پێكرد و هه‌ره‌شه‌ كردن و ته‌قاندنه‌وه‌ی كلیسه‌كانیان وشوێنه‌ پیروزه‌كانیان ودوكان و شوێنی كاروكه‌سابه‌تیان و كوشتن و تیرۆر كردن له‌سه‌ر ره‌گه‌زنامه‌ چونكه‌ جیاوازن له‌ ئاین و سوكایه‌تی له‌بازار و شه‌قامه‌كان بونه‌ دیارترین ئه‌و شتانه‌ی كه‌ له‌عێراقی تازه‌ هاته‌ سه‌ر مه‌سیحیه‌كان به‌تایبه‌ت له‌به‌سره‌ و به‌غدا و موصل وبه‌داخوه‌ تا ئیمرو هه‌ر به‌رده‌وامه‌،له‌ ساڵی 2003 تا وه‌كو ساڵی 2014 :

1107 مه‌سیحی شه‌هید كراوه‌.

14 له‌ پیاوه‌ ئاینه‌كان به‌ مه‌تران وقه‌شه‌ تیرور كراوه‌.

114 كه‌نیسه‌ی مه‌سیحیه‌كان له‌ به‌غدا وموصل ته‌عدایان لێ كراوه‌ وته‌قێندراوه‌.

53 كه‌س شه‌هید بوون به‌ته‌قاندنوه‌ی كه‌نیسه‌ ( سیده‌ النجاه‌).

له‌و كاته‌وه‌ رۆژگارێكی سه‌خت هاته‌ پێش بۆ مه‌سیحیه‌كان و ئاواره‌یی ده‌ستی پێكردو ناچار كران ماڵ و موڵكی خۆیان به‌جێ بهێڵن و بێنه‌وه‌ هه‌رێمی كوردستان كه‌ هه‌میشه‌ به‌درێژایی میژوو هاوخه‌بات بون ئێره‌یان به‌ماڵی خۆیان زانیوه‌ و لێره‌ ژیان و كه‌ڕامه‌تیان پارێزراوه‌ و هه‌ست به‌ئارامی ده‌كه‌ن سه‌ره‌ڕای بونی كه‌م و كوڕی وچاره‌سه‌ر نه‌كردنی به‌شێك له‌ كێشه‌كانیان  وزۆرجار بێ به‌ش بونیان له‌ماف و ئیمتیازی خۆیان وه‌كو نه‌ته‌وه‌یه‌ك.

بۆ مه‌سیحیه‌كان هه‌میشه‌ رۆژه‌كانی مێژوو كاره‌ساتی تازه‌ی هێناوه‌ له‌و وڵات و له‌خاكی خۆیان و مه‌ترسی هه‌بوه‌ بۆ سه‌ر ناسنامه‌ و كه‌لتوریان ئه‌وه‌بو دوای ئه‌وه‌ی له‌ مانگی ئابی 2014 كه‌ گروپی تیرۆریستی داعش هێرشیان كرده‌ سه‌ر موصل و ده‌شتی نه‌ینه‌وا، سه‌ره‌ڕای ئه‌وه‌ی ئه‌و شارو ناوچه‌یان كاول كرد و هه‌زاره‌ها كچ و ژنی ئێزدیان برد وه‌ك سه‌بایا ته‌نها له‌به‌ر ئه‌وه‌ی ئایینیان جیاوازبوو پیاوه‌كانیان كوژران و كوڕه‌كانیان خرانه‌ ناو خولی راهێنانی چه‌ك  و كوشتن و به‌زۆر ئاینیان پێ گۆرین . سه‌ره‌رای ئه‌وه‌ش مه‌سیحه‌یه‌كان دیسان له‌و كۆمه‌ڵكوژی و كاولكاریه‌ بێ به‌ش نه‌بون و سه‌دانیان لێ كوژرا و ده‌ربه‌ده‌ر كران و ته‌نانه‌ت به‌شێكیان تا ئێستاش بێ سه‌رو شوێنه‌ و ماڵ و خاكیان سوتێنرا و كه‌نیسه‌كانیان روخێنراو شارستانیه‌تی هه‌زاره‌ها ساڵاڵه‌یان خاپور كرا و له‌ناوبرا.

دیسان ئه‌و خه‌ڵكه‌ی ده‌شتی نه‌ینه‌واش كه‌ ژماره‌یان زیاتر له‌ (120) هه‌زار كه‌س ده‌بوو ڕویان له‌هه‌رێمی كوردستان كرد چونكه‌ بۆ مه‌سیحیه‌كان هه‌میشه‌ كوردستانیان شوێنێكی ئارام  و سه‌قامگیر بوه‌ بۆیان و باوه‌شیان بۆ مه‌سیحیه‌كان و خه‌ڵكانی تری لێقه‌وماو كرده‌وه‌ ته‌نانه‌ت بۆ ئه‌و خه‌ڵكانه‌ی كه‌ له‌ رابردوو له‌سه‌ر حوكم بون له‌و سوننانه‌ی كه‌ 80 ساڵ حوكمی عێراقیان كردو هه‌مو تاوانێكیان به‌رامبه‌ر پێكهاته‌كانی كوردستان خۆیان كرد و ئه‌نفال و كیمیا باران و له‌ناوبردنی گونده‌كان كه‌ ئه‌وكاتیش گونده‌كانی مه‌سیحیه‌كانیش به‌شێك بون له‌و له‌ناو چون ئه‌نفال كردن و سوتانه‌ له‌سه‌ر ده‌ستی ئه‌و رژێمه‌ یه‌ك له‌دواییه‌كانه‌ی عێراق.

ئێستاش قۆناغێكی تازه‌ هاتۆته‌ پێشه‌وه‌ ئه‌ویش دوو بابه‌تی گه‌رمی رۆژ و ناوچه‌كه‌یه‌ یه‌كه‌میان كۆتایی هاتنی داعش له‌موصل وده‌شتی نه‌ینه‌وا كه‌ هێزه‌كانی پێشمه‌رگه‌ وهێزه‌ عراقیانی تر رزگاریان كرد و رزگاركردنه‌وه‌ی ئه‌و ناوچانه‌ی له‌ ژێر ده‌ستی بون وه‌ دووه‌م كه‌ زۆر گرنگه‌ ئه‌ویش پرسی ریفراندۆمی هه‌رێمی كوردستان بۆ سه‌ربه‌خۆییی و ده‌وڵه‌تی كوردستان كه‌ مافی چاره‌نوسه‌ بۆ هه‌مو پێكهاته‌كان به‌ بێ جیاوازی له‌ چوارچێوه‌ی پاراستنی ماف و ئازادییه‌كان وبه‌ پێی پرنسیپه‌ نێودوله‌تیه‌كان وبنه‌مایه‌كانی مافی مرۆڤ وپێكه‌وه‌ ژیان ویه‌كتر قبول كردن.

مه‌سیحیه‌كان وا ده‌ڕوانن كه‌ ئیتر پێویسته‌ بگه‌ڕێنه‌وه‌ خاك و ناوچه‌كانی خۆیان به‌ تایبه‌تی ده‌شتی موصل و پێویسته‌ شوێنه‌كانیان ئاوه‌دان بكرێته‌وه‌ و ژیانی تازه‌ ده‌ست پێ بكه‌نه‌وه‌ و حكومه‌تی عێراق قه‌ره‌بویان بكاته‌وه‌ و هاوكاریان بكات بۆ ئه‌وه‌ی بتوانن ماڵه‌كانیان نۆژه‌ن بكه‌نه‌وه‌ وه‌ پیویسته‌ پارێز به‌ندیه‌كی نێو ده‌وڵه‌تی و ناوخۆیش هه‌بێت بۆ ئه‌وه‌ی له‌مه‌ودوا چیتر نه‌كه‌ونه‌ ژێر هه‌ره‌شه‌ی له‌ناوبردن وكۆچ  و ده‌ربه‌ده‌ری وه‌ هان بدرێن بۆ گه‌ڕانه‌وه‌یان و دابین كردنی مافه‌كانیان وئه‌وان چاره‌نوسی خۆیان دیار بكه‌ن له‌ژێر پارێزگایه‌ك به‌ناوی ده‌شتی نه‌ینه‌وا بۆ هه‌مو پێكهاته‌كان ( مه‌سیحی وئێزیدی وشه‌به‌ك وكورد).

بۆ پرسی ریفراندۆم مه‌سیحیه‌كان وا ده‌بینن كه‌ بۆ ئه‌وه‌ی ئه‌وانیش چیتر رووبه‌ری چه‌وسانه‌وه‌ نه‌بن و مافه‌كانیان پارێزراو بن و به‌شداری راسته‌قینه‌ بن له‌ حوكمرانی و خۆیان نوێنه‌ری خۆیان بن و ئه‌و خاك و موڵك و شوێنانه‌ی لێیان داگیركراوه‌ه‌ بۆیان بگه‌ڕێته‌وه‌ له‌سایه‌ی ئه‌و ده‌وڵه‌ته‌ی دروست ده‌كرێت و به‌ ئی خۆیانی بزانن بۆیه‌ به‌هه‌مو شێوه‌ك مه‌سیحیه‌كان پشتیوانی له‌و ده‌وڵه‌ته‌ ده‌كه‌ن ، ئه‌گه‌رچی هه‌ندێك جار لێره‌و له‌وێ چه‌ند ده‌نگێكی نه‌شاز كه‌دورن وناشاره‌زان له‌ ره‌وشی مه‌سیحیه‌كان له‌م ناوچه‌یه‌  ده‌یانه‌وێ له‌و هه‌وڵانه‌ كه‌م بكه‌نه‌وه‌و بیانه‌وێ خۆیان وه‌ك خه‌مخۆری مه‌سیحیه‌كان پیشان بده‌ن كه‌ به‌هیچ شێوه‌ك دوورو نزیك هیچیان نه‌كردوه‌ بۆ مافی مه‌سیحیه‌كان وه‌كو پێكاتىیه‌كی ئاینی ونه‌ته‌ویى ( كه‌لدان و سریان و ئاشوری) وبه‌به‌رده‌وامی كاریان كردوه‌ بۆ به‌رژه‌وه‌ندی شه‌خصی وبه‌حزبایه‌تی ته‌سك و ته‌نها ده‌یانه‌وێ خه‌ڵك ساردبكه‌نه‌وه‌ بۆ چه‌ند ئه‌جندایه‌ك لای ئێمه‌ ده‌ست نیشان كراوه‌ وباش ئاگادارین وبه‌ چ لایه‌نه‌ك لكاون، به‌ڵام ئیتر مه‌سیحیه‌كان باش له‌وه‌ تێگه‌یشتون كه‌ ده‌توانن له‌و ده‌وڵه‌ته‌ تازه‌یه‌ مافه‌كانی خۆیان به‌رجه‌سته‌ بكه‌ن و ئیراده‌ی خۆیان بچه‌سپێنن و پارێزگاری له‌ناسنامه‌ی راسته‌قینه‌ی خۆیان بكه‌ن. وه‌ ئه‌مرۆش كه‌ له‌هه‌ریمی كوردستان چه‌ند هه‌نگاوێك نراوه‌ بۆ دابین كردنی مافی مه‌سیحیه‌كان و پێكهاته‌كانی تر ئه‌ویش به‌ده‌ركردنی یاسای ژماره‌ (5 )ی ساڵی 2015 له‌ به‌رله‌مانی كوردستان كه‌ به‌یاسایه‌كی گرنگ ده‌زانرێت ئه‌گه‌ر چی له‌بواری جێ به‌جی كردن هێشتا به‌ته‌واوی نه‌چۆته‌ بواری كارپێكردنه‌وه‌ و چه‌ند كه‌م و كوڕی هه‌یه‌ به‌ڵام بونی زۆر باشتره‌ له‌ نه‌بونی, به‌ڵام له‌ عیراقی فیدرال وبه‌پێى مادده‌ی 125 له‌ ده‌ستوری هه‌میشه‌ی كه‌باس له‌ مافه‌كانی پێكهاته‌كانی عیراق وزامن كردنیان به‌ یاسا كردوه‌ ئه‌وه‌ له‌ ساڵی 2005 وتا ئیمرۆ ئه‌م یاسایه‌ رێك نه‌خراوه‌ وباوه‌رم نیه‌ ده‌ر بكرێت.

بۆیه‌ ده‌كرێ له‌ژێر سایه‌ی ده‌وڵه‌تی كوردستان كه‌ ده‌وڵه‌تی هه‌موو پێكهاته‌و ئایینزاكان بێت و ئه‌و یاسایانه‌ش جێ به‌جێ بكرێت و له‌ده‌ستوری هه‌میشه‌یی ئه‌و ده‌وڵه‌ته‌ش مافه‌كان بچه‌سپێنرێن ، ئه‌وه‌شی گرنگه‌ بۆ سه‌ركردایه‌تی ئێستای كوردستان له‌و قۆناغه‌ی به‌ره‌و ریفراندۆم وده‌وڵه‌ت خاوه‌ندارێتی مه‌سیحیه‌كان به‌گرنگ بزانن ودڵنیایان بكه‌ن و  به‌فعلی به‌شداریان پێ بكه‌ن له‌و پرسه‌ وه‌ك خاوه‌ن ماڵ نه‌وه‌ك وه‌ك میوان و به‌ڵكو ڕاو وقسه‌ی حزب و رێكخره‌وكانی مه‌ده‌نی ودامه‌زراه‌كانیان  وه‌ربگرن و داواكاریه‌كانیان له‌ روی مافه‌ نه‌ته‌وی له‌به‌ر چاو بگرن مافه‌كانیان دیار بێت و سه‌لمێنراو بێت . بۆ ئه‌وه‌ی ئیتر له‌و ده‌وڵه‌ته‌وه‌ هه‌موو لایه‌ك پشوه‌ك بده‌ن و بحه‌سێنه‌وه‌ و به‌مافه‌كانیان شادبن وه‌ك ئه‌و گه‌لانه‌ی تر بژین كه‌خاوه‌نی كیان و ده‌وڵه‌تی خۆیانن و ئه‌وه‌ش مافێكی سه‌ره‌تایی مرۆڤه‌كانه.

من دڵنیام كه‌ ئاینده‌ی هه‌مو پێكهاته‌كانی كوردستان له‌ ده‌وڵه‌تی تازه‌ پارێزراو ده‌بێت له‌چوار چێوه‌ی ده‌ستورێكی نمونه‌یی وئه‌م ده‌وڵه‌ته‌ كه‌ به‌ فره‌ ئاین و نه‌ته‌وه‌ ده‌ناسرێت ده‌بێته‌ هۆی پاراستنی ئاسایش و سه‌قامیگیری له‌و ناوچه‌یه‌ چونكه‌ ده‌بێته‌ خاوه‌ن ئیراده‌ی خۆی و ده‌وڵه‌ته‌كانی تریش سودمه‌ند ده‌بن له‌ سه‌روه‌ت وسامانی كوردستان ژێرخانه‌كه‌ی و پته‌و كردنی په‌یوه‌ندی ‌ئابوری كه‌ له‌خزمه‌تی دراوسێ كان ده‌بێت، وه‌ بۆ گه‌لانی هه‌رێمی كوردستانیش ده‌بێته‌ ئارامگه‌یه‌ك بۆ گه‌یشتن به‌ ئاوات و خه‌باتی 100 ساڵى رابردو.

 

ضياء بطرس

سه‌رۆكی ده‌سته‌ی سه‌ربه‌خۆی مافی مرۆڤ

 

Share This