رۆژی دوشه‌ممه‌ 15 ی ته‌موزی 2019 ئه‌نجومه‌نی وه‌زیرانی هه‌رێمی كوردستان له‌ كۆبونه‌وه‌ی یه‌كه‌می ئاسایی خۆی ، چه‌ند بڕیارێكی ده‌ركرد به‌ ئاڕاسته‌ی پرسی شه‌فافیه‌ت و ڕێكخستنه‌وه‌ی كاروبارو ده‌وامی فه‌رمانگه‌كان و كه‌مكردنه‌وه‌ی ڕۆتین و ئاسانكاری بۆ هاوڵاتیان بۆ ڕایی كردنی كاره‌كانیان و یه‌كلا كردنه‌وه‌ی سكاڵای هاوڵاتیان.

ئێمه‌ له‌ده‌سته‌ی سه‌ربه‌خۆی مافی مرۆڤ وێڕای به‌رز نرخاندنی ئه‌و بریارانه‌ كه‌ له‌به‌رژه‌وه‌ندی خه‌ڵك و هاوڵاتیانی هه‌رێمی كوردستانه‌ له‌هه‌مان كاتدا پتشیوانی هه‌نگاوه‌كانی حكومه‌ت ده‌كه‌ین و ئه‌وه‌ش سه‌ره‌تایه‌كه‌ بۆ به‌ ئاڕاسته‌ی بردنی كاروباری ده‌زگاو فه‌رمانگه‌كانی هه‌رێمی كوردستان به‌ره‌و كاری ده‌زگایی (مؤسساتى) كه‌ ده‌رفه‌تێكی گرنگه‌ بۆ ڕایی كردنی مامه‌ڵه‌ی هاوڵاتیان و نه‌هێشتنی واسیته‌و ڕۆتین و خزمێنه‌و كاری نایاسایی.

ئه‌وه‌ی به‌لای ئێمه‌وه‌ گرنگه‌ به‌شێكی ئه‌و بریارانه‌ په‌یوه‌ستن به‌بابه‌تی ده‌ستكه‌وتنی زانیاری و پاراستنی ئه‌و زانیاریانه‌ی كه‌ به‌ده‌ر كراون و پێویستیان به‌پاراستن هه‌یه‌ له‌فه‌رمانگه‌و ده‌زگاكانی حكومه‌ت و به‌ پێ ی یاسا ڕێگه‌ نه‌دراوه‌ بۆ بڵاو كردنه‌وه‌و گواستنه‌وه‌یان ، ئێمه‌ لێره‌دا دووباره‌ جه‌خت ده‌كه‌ینه‌وه‌ له‌سه‌ر ئه‌وه‌ی كه‌ به‌ جێ به‌جێ كردنی یاسای مافی به‌ده‌ست هێنانی زانیاری ژماره‌ (11) ی ساڵی 2013 و ده‌ركردن و گشتاندن و بڵاو كردنه‌وه‌ی ڕێنماییه‌كانی ئه‌و یاسایه‌ رۆڵی گرنگی ده‌بینی له‌ هه‌نگاو نان به‌ ئاڕاسته‌ی شه‌فافیه‌ت و ده‌ستكه‌وتنی زانیاری و جێ به‌جێ كردنی به‌شێكی ئه‌و بریارانه‌ .

هیوادارین ئه‌نجومه‌نی وه‌زیران له‌هه‌نگاوه‌كانی تری له‌داهاتویه‌كی نزیك به‌ته‌واوی چاره‌سه‌ری پرسی موچه‌ی فه‌رمانبه‌ران و قه‌رزه‌كانی فه‌رمانبه‌ران و مامۆستایان لای حكومه‌ت بكات و كێشه‌ هه‌لپه‌سێردراوه‌كانیش له‌گه‌ڵ حكومه‌تی ناوه‌ند به‌ده‌ستورو دیالۆگ چاره‌سه‌ربكات له‌به‌رژه‌وه‌ندی هاوڵاتیانی هه‌رێمی كوردستان ، له‌كۆتایشدا  به‌ ووردی چاودێری جێ به‌جێ كردنی هه‌نگاوه‌كانی ئه‌و بڕیارانه‌ بكات و رێگه‌ نه‌درێت چیتر كاری هاوڵاتیان دوا بكه‌وێ و ڕێگری له‌ به‌رتیل و رۆتین بگیرێ ، ئه‌وه‌ش به‌ ئاڕاسته‌ی بونیات نانی كۆمه‌ڵگه‌یه‌كی شارستان و حكومه‌تێكی به‌تواناو به‌هێز و خزمه‌تگوزار بۆ هاوڵاتیان.

ده‌سته‌ی سه‌ربه‌خۆی مافی مرۆڤ

16 ی ته‌موزی _ 2019

Share This